Trump na Putin biteganyijwe guhura mu minsi iri imbere, nk’uko Umujyanama wa Kremlin abivuga

Perezida wa Leta Zunze Ubumwe za Amerika, Donald Trump, na Perezida w’u Burusiya, Vladimir Putin, bemeranyije guhura mu minsi iri imbere, nk’uko byatangajwe n’umujyanama wa Kremlin.

Ibi bije nyuma y’uko Trump atangaje ko hari “amahirwe menshi” y’uko yaba agiye guhura n’abayobozi b’u Burusiya n’u Buyukiraniya icyarimwe “vuba cyane”, baganira ku buryo bahagarika intambara yo muri Ukraine.

Igihe ntarengwa Trump yahaye u Burusiya ngo bube bwemeye agahenge kaburizwamo n’ibihano bikomeye bishya, kirarangira ku wa Gatanu.

Ibiganiro bishoboka hagati ya Trump na Putin bikurikiye uruzinduko rw’intumwa ya Amerika, Steve Witkoff, wagiranye ibiganiro na Perezida Putin ku wa Gatatu.

Witkoff amaze kujya i Moscou inshuro enye mbere y’iyi, kandi buri gihe uruzinduko rwe rwakurikirwaga n’amagambo y’icyizere atangazwa na Trump, ariko ntihagire intambwe igaragara iterwa mu biganiro by’amahoro.

Ku wa Gatatu nijoro, Trump yabajijwe n’abanyamakuru muri White House niba Perezida wa Ukraine, Volodymyr Zelensky, na Putin bemeranyije ku nama y’impande eshatu, maze asubiza ko “hari amahirwe menshi cyane” y’uko bizaba.

Umujyanama wa Kremlin, Yuri Ushakov, yemeje ko igitekerezo cy’inama y’impande eshatu cyavuzwe mu biganiro byabereye i Moscou ku wa Gatatu, ariko nk’uko ibitangazamakuru by’u Burusiya byabitangaje, yavuze ko u Burusiya “bwagisize kidatangajweho byinshi”.

Zelensky nawe yagaragaje ko ashyigikiye iyo nama, abinyujije kuri X (Twitter) agira ati: “Twebwe muri Ukraine twagiye twongera kugaragaza ko gushaka ibisubizo nyabyo bishobora kugerwaho neza binyuze ku rwego rw’abayobozi.”

Yongeraho ko “bikenewe kugena igihe inama yabera n’ibibazo bizayigwaho.”

Ushakov yavuze ko ahantu hateganyirijwe guhurira kwa Trump na Putin hamaze kwemezwa, ariko andi makuru azatangazwa nyuma. Yongeraho ko impande zombi zatangiye gutegura ibisabwa kugira ngo iyo nama izabe.

Mu kwezi gushize, Trump yemereye BBC ko nyuma y’inshuro zose enye Witkoff yasuye Moscou, Putin yagiye amutenguha, nubwo ibiganiro byatangiraga neza, bikarangira nta gihindutse.

Ubu, Perezida Trump avuga mu buryo buringaniye, agira ati: “Simbita intsinzi… twamaze igihe kinini dukora kuri ibi. Hari ibihumbi by’urubyiruko bipfa… Ndi hano kugira ngo ibi birangire.”

Ku wa Gatatu, Kremlin yasohoye itangazo ritarimo byinshi ku ruzinduko rwa Witkoff, ivuga ko ibiganiro byari “byubaka” kandi impande zombi “zatanze ibimenyetso” bijyanye n’ibyo ziteganya.

Zelensky we yavuze ko yavuganye na Trump kuri urwo ruzinduko, ndetse hakaba hari n’abandi bayobozi b’i Burayi bari ku murongo w’iyo nama.

Perezida wa Ukraine yaherutse kuvuga ko u Burusiya butazemera amahoro y’ukuri keretse igihe amafaranga buhaye gutera intambara yaba arangiye.

Nubwo Trump yahaye u Burusiya igihe ntarengwa kugeza ku wa Gatanu, ibyiringiro byo kubona amasezerano y’amahoro y’ukuri ni bike, cyane ko u Burusiya bukomeje ibitero by’indege bikomeye muri Ukraine, butitaye ku bihano bishya byatewe ubwoba na Amerika.

Mu gihe igitutu gikomeje kwiyongera, ku wa Gatatu Trump yashyize umukono ku itegeko ritegeka ko ibicuruzwa biva mu Buhinde byongerwaho 25% by’imisoro, kubera ko icyo gihugu gikomeje kugura peteroli y’u Burusiya.

Mbere yo gutangira manda ye muri Mutarama, Trump yari yavuze ko ashobora kurangiza intambara hagati y’u Burusiya na Ukraine mu munsi umwe. Ariko iyo ntambara iracyakomeje, kandi amagambo ye ajya ku Burusiya ubu arushaho gukomera.

Inshuro eshatu z’ibiganiro hagati ya Ukraine n’u Burusiya byabereye i Istanbul ntizigeze zitanga umusaruro, kandi imyaka itatu n’igice irashize u Burusiya buteye Ukraine byeruye.

Ibyo u Burusiya busaba kugira ngo habe amahoro, birimo ibisabwa Ukraine bidashobora kwemerwa na Kyiv cyangwa abafatanyabikorwa bayo bo mu Burengerazuba bw’Isi.

Ibyo bisabwa birimo ko Ukraine yaba igihugu kitagira aho gihengamiye (kitari muri NATO), igakora impinduka zikomeye mu gisirikare cyayo, ikanareka gahunda yo kwinjira muri NATO.

U Burusiya bwanasabye ko Ukraine ikura ingabo zayo mu turere tune tumwe bwarangije gutwara igice: Donetsk, Luhansk, Kherson na Zaporizhzhia, ndetse n’igice cya Crimea bwigaruriye.

Ibindi bisabwa ni uko Ukraine itakwemererwa kwinjira mu muryango uwo ari wo wose w’ubwirinzi, hagashyirwaho igipimo ntarengwa cy’ingabo igomba kugira, ururimi rw’Ikirusiya rugahabwa icyubahiro nk’urwemewe, ndetse n’ibihano mpuzamahanga byakuweho ku Burusiya.

Kremlin kandi yakomeje kwanga ubusabe bwa Kyiv bwo kugirana ibiganiro byihariye hagati ya Zelensky na Putin.

Mu gihe ibi byose bikomeje, Leta Zunze Ubumwe za Amerika yemeye gutanga indi nkunga ya gisirikare ya miliyoni $200 ku wa Kabiri, irimo no gufasha Ukraine mu ruganda rwo gukora indege zitagira abapilote (drones).

Kivu24.rw