Rubavu: Umuhanda Kabuhanga-Muhato uratangira gukorwa bitarenze Nyakanga 2024
Iteka rishya rya Minisitiri ryashyizweho umukono na Minisitiri w’ibidukikije, Jeanne d’Arc Mujawamariya ndetse na Minisitiri w’ubutabera akaba n’Umushinjacyaha Mukuru, Emmanuel Ugirashebuja, ryemeza itangwa ry’ingurane ku mutungo mu nyungu rusange ku mihanda ine igiye kubakwa.
Kwemeza itangwa ry’ingurane byatangajwe ku wa 20 Ukuboza 2023, mu igazeti ya Leta byakozwe mu rwego rwo gutegura kubaka no gusana imihanda irimo uwa Base (Rulindo) -Butaro (Burera) -Kidaho (Burera) umuhanda, Sashwara (Nyabihu) – Rega (Nyabihu)-Mutovu (Rubavu), Umuhanda wa Kabuhanga (Rubavu)-Busasamana (Rubavu)- Muhato (Rubavu) , Umuhanda Mukoto (Rulindo)-Nyacyonga (Gasabo) ndetse n’uwa Kigali Logistics Platform (Kicukiro)-Bugesera.
Minisitiri w’ibidukikije yatangarije The New Times ko impamvu ari yo Minisiteri yagize uruhare mu kwemeza uyu mushinga w’ikorwa ry’imihanda ari uko n’ubusanzwe ariyo ifite itegeko ry’itangwa ry’ingurane ku nyungu rusange mu Nshingano ndetse ibi bikorwa bikaba bizanagira ingaruka ku bidukikije.
Ati: “Ibyo twakoze nka Minisiteri y’ibidukikije ni ugutanga uburenganzira ku mishinga yo kubaka umuhanda dore ko itegeko ryo kwimura abantu naryo rituruka muri Minisiteri y’ibidukikije. Ubutaka burimo ibidukikije nk’amashyamba n’ibindi, dushinzwe nabyo bizagerwaho n’ingaruka mu gihe cyo gutanga ingurane kubw’inyungu rusange. ”
Yavuze ko icyemezo cya Minisitiri kigamije kumenyesha abaturage ibijyanye n’itangwa ry’ingurane n’indishyi zikwiye nk’uko amategeko abiteganya mu nyungu rusange.
Ati: “Abaturage bafite imitungo ku muhanda bagomba koroshya itangwa ry’ingurane mu gihe bazaba bagezwaho ibyavuye mu bushakashatsi buteganijwe ku butaka”.
Umuyobozi mukuru w’ikigo gishinzwe iterambere ry’ubwikorezi mu Rwanda (RTDA), Imena Munyampenda, yatangarije The New Times ko ku muhanda wa Base-Butaro-Kidaho, hasinywe amasezerano kandi kwimura abantu bizatangira bitarenze Mutarama 2024.
Yavuze ko amasoko akomeje gutangwa ku muhanda wa Sashwara-Rega-Kabuhanga-Muhato kandi biteganijwe ko azarangira muri Mata, mu gihe gutanga ingurane no kwimura abantu bizatangira hagati ya Kamena na Nyakanga.
Ati: “Ku muhanda wa Nyacyonga-Mukoto, hasinywe amasezerano kandi kwimura abantu no kubaha ingurane bizatangira muri Werurwe.”
Kuri Kigali Logistics Platform –Bugesera, yavuze ko amasoko azatangira hagati ya Gashyantare na Werurwe, naho gutanga ingurane bikazatangira mu mpera z’umwaka
Ikigo gishinzwe iterambere ry’ubwikorezi mu Rwanda cyahawe umushinga wo gutunganya imihanda ifite uburebure bwa kilometero 81.7 yambukiranya Intara n’Uturere mu rwego rwo kurushaho kunoza ubuhahirane.
Muri iyo mihanda harimo iyo mu gice cy’Amajyaruguru y’Uburengerazuba mu Turere twa Musanze, Nyabihu na Rubavu, iri mu bice bitatu: Kinigi-Kishwa (48.4 km), Kabuhanga-Bugarama-Kiraro (10.7km) na Kabuhanga-Busasamana-Cyanzarwe-Muhato (22,6 km).
Umuhanda uva Kabuhanga ugana Rubavu umeze nabi kandi mu gihe wari ukeneye kunozwa kugira ngo ukemure ikibazo cy’umusaruro w’ubuhinzi uturuka muri aka Karere ku bwinshi ariko abahinzi bakagorwa no kuwugeza ku isoko haba mu Gihugu ndetse no hakurya y’imipaka.
Kivu24.rw