Rubavu:Abaturage b’Imirenge ya Cyanzarwe na Rubavu bitege iki ku bufatanye bw’Imirenge yombi?
Mu cyerekezo cyo gukomeza kwigiranaho ndetse no kuzamura ubufatanye mu kwesa Imihigo muri rusange,Ubuyobozi bw’Imirenge ya Rubavu na Cyanzarwe iherutse gusinyana amasezerano y’ubufatanye agamije kwigiranaho mu kwesa imihigo ndetse no gukemura ibibazo bitandukanye bikiri muri iyi Mirenge.
Ubuyobozi bw’Iyi Mirenge yombi buvuga ko aya masezerano y’ubufatanye ashingiye ku gusangira ubunararibonye mu kurushaho kunoza ibyo basanzwe bakora, kuzamura ubuhahirane, guhererekanya amakuru mu kubungabunga umutekano nk’Imirenge ituriye umupaka ndetse no guhahirana nk’abaturanyi badahuje ibyo beza.
Umunyambanga Nshingwabikorwa w’Umurenge wa Rubavu HARERIMANA Emmanuel Blaise ashimangira ko aya masezerano agamije gusangira ubunararibonye mu gushyira mu bikorwa gahunda za Leta zitandukanye muri rusange harimo nk’uburyo bwo gusubiza ibibazo bikibangamiye imibereho myiza y’abaturage ndetse no kwihuta mu iterambere ry’ubukungu binyuze mu buhahirane.
Yagize ati: “Iki gitekerezo cyavuye ku bunararibonye Imirenge yombi igenda irushanya, hari ibyo turimo imbere bazatwigiraho nabo hari ibyo bafite bahagazemo neza kuturusha natwe nk’abaturanyi dukeneye kwigiraho. Aya masezerano rero aratuganisha ku kurushaho gukora neza kurusha uko twakoraga binyuze mu bufatanye no gusangira ubunararibonye muri gahunda zitandukanye duhuriyeho.”
Yongeraho ko by’umwihariko aya masezerano azafasha abaturage b’imirenge yombi kurushaho gushyikirana nk’abaturanyi ndetse no kunoza ubuhahirane hashingiwe ku kuba Umurenge wa Rubavu ufite igice kinini cy’Umujyi na Cyanzarwe ikagira ubutaka buhingwa kandi bukera.
Ibi kandi abihuza na mugenzi we w’Umurenge wa Cyanzarwe Uwimana Vedaste wongeraho ko nk’Imirenge ituriye umupaka aya masezerano azafasha Imirenge yombi kurushaho guhererekanya amakuru no gufatanya mu kubumbarira umutekano kimwe no gukemura bimwe mu bibazo bitandukanye by’abashobora ku wuhungabanya bitwaje kuva mu Murenge umwe bajya mu wundi.
Ati:”Umuturage wa Cyanzarwe n’Umiturage wa Rubavu ni abaturage bamwe, duhuje ibintu byinshi birimo n’umupaka,iby’ingenzi biri muri aya masezerano harimo gufatanya mu guhana amakuru ducunga umutekano,turwanya ubujura ndetse n’ibindi byawuhungabanya. Aya masezerano azadufasha nanone guteza imbere ubuhahirane kuko Rubavu ifite igice kinini cy’umujyi twizeye ko abahinzi bacu bazahungukira isoko ry’umusaruro wabo.”
Yongeraho ko by’umwihariko abaturage b’Umurenge wa Cyanzarwe batangiye kwigira ku Mudugudu ntangarugero wo mu Murenge wa Rubavu witwa Bubaji uherutse kwegukana igihembo ku wego rw’Akarere kubera uburyo gahunda zitandukanye zigamije iterambere ziwushyirwamo mu bikorwa akanagaragaza ko ariko nabo mu byo Umurenge wa Rubavu uzabigiraho harimo kurushaho kunoza gahunda y’Umurenge mu Kagari ndetse n’Akagari mu Mudugudu yemeza ko aribo bayitangije ubu bakaba bagenda bayisogongezaho abandi.
Nyuma yo gusinyana aya masezerano Imirenge yombi yakomereje mu busabane ikina umupira w’amaguru mu mukino warangiye Umurenge wa Rubavu utsinze uwa Cyanzarwe ibitego 2 kuri 1.
