Rutsiro: Abadepite basanze 95% by’ibazo basize bitarakemuwe;Abayobozi bati: ‘’Turacyari bashya’’.

Itsinda ry’Abadepite mu Nteko Ishingamategeko riri mu ruzinduko mu Karere ka Rutsiro ryatangaje ko 95% by’ibibazo basigiye Ubuyobozi bwagombaga gukurikirana ikemurwa ryabyo mu ruzinduko ruheruka mu mezi 6 ashize bitigeze bikemurwa banenga bamwe mu Bayobozi kwitwaza ko ari bashya ntibakemure ibibazo by’abaturage.

Ibi byagarutswe n’itsinda ry’Abadepite riyobowe na Hon Habineza Frank riri mu ruzinduko muri aka Karere mu rwego rwo kwegera abaturage hagamijwe kureba ishyirwa mu bikorwa rya gahunda za Leta zitandukanye zigamije iterambere ry’ubukungu n’imibereho myiza,gufasha abaturage gukemura ibibazo bafite ndetse no kumva ibyifuzo byabo.

Hon Frank Habineza yanenze bamwe mu Bayobozi bo mu Karere ka Rutsiro mu nzego zitandukanye kuba batarashyize imbaga mu gukemura ibibazo byagaragaye mu ruzinduko rw’ubushize bitwaje ko ari bashya abasaba kwikubita agashyi bakihutira kubikemura.

Yagize ati:‘’Twasanze mu bibazo Abadepite basize ubushize hafi 95% bitarakemutse harabayemo ibintu by’uburangare Abayobozi benshi cyane bavugo ngo ni bashyashya ntibashobore kubikemura bitwaza ko ari bashyashya twababwiye ko rero rwose iyo atariyo mpamvu yo kwitwaza ngo  ntibashoboye kubikemura tubasaba ko bagomba kwihutira kubikemura mu maguru mashya. Icyo kibazo natwe twakibonye hano.’’

Yongeraho ko hari n’aho abaturage bagiye bagaragaza ko ibibazo bitandukanye ndetse n’amakimbirane biterwa na bamwe mu Bayobozi mu nzego z’ibanze barimo by’umwihariko Abakuru b’Imidugugu abasaba kwikubita agashyi bagakorera mu nyungu z’abo bayoboye.

Ku ruhande rw’Abaturage bagaragaza ko muri aka Karere hari ikibazo cya bamwe mu Bayobozi usanga bifata nkaho badakorera abaturage bituma mu gihe cyose baba badashaka kugira icyo bakora ku bibazo bitandukanye baba bagejejweho.

Kimwe mu bibazo bimaze iminsi cyagarutsweho harimo icy’uwari Umunyamabanga Nshingwabikorwa w’Akagari witabye Imana yari yaratanze ubwizigame bwe muri Ejo Heza umuryango we ukaba umaze igihe kigera ku mwaka utarafashwa kubona ibiteganywa n’amategeko ahubwo usiragizwa mu nzego zitandukanye.

Nizeyimana Jean Damascene, Umugabo wa Nyakwigendera yagize ati: ‘’Natanze dossier yuzuye ntegereza igisubizo mbonye bitinze nsubira kubaza uko byagenze bambwira ko basanze nta cyiciro cy’ubudehe umuryango wanjye ufite kandi nyamara twari tugisanganywe. Nk’umukuru w’umuryango Umugore wanjye yari ambaruyeho kandi umuryango wanjye ufite icyiciro cy’ubudehe cya gatatu ndetse mfite n’ibipapuro byavuye muri sisitemu biteyeho yewe n’amakashe naberetse ariko uburyo bakomeza kunderega bavuga ngo nta cyiciro gihari nibyo ntasobanukirwa.Nta muntu ushaka kumbwira ngo kora gutya birangire. Ese kitanahari wenda kukibona byamara umwaka?’’

Agaragaza ko kuba hari bimwe mu bibazo by’abaturage bitnda gukemurwa ugasanga bimaze igihe kirekire bishingira ku bushake buke bwa bamwe mu Vayobozi batumva akababaro abaturage baba bafite ngo bishyire mu kimbo cyabo bityo babafashe kubikemura vuba.

Mu ruzinduko nk’uru Abadepite bagirira mu Karere ka Rubavu,Visi Perezida w’Inteko Ishingamategeko Umutwe w’Abadepite Hon Sheikh Moussa Fazil Harereimana yagaragaje ko ikibazo cyo kutegera abaturage ngo bafashwe gukemurirwa ibibazo gishingiye ku kutagira ubupfura bidakwiye kuranga Umuyobozi mwiza asaba kwikubita agashyi.

Ndungutse Abdoulkarim, Kivu24.rw