Kagame Cup: Umurenge wa Busasamana washimiwe kongera kuzamura ibendera rya Rubavu mu mupira w’amaguru
Abayobozi batandukanye mu Karere ka Rubavu ndetse n’abaturage bashimiye Umurenge wa Busasamana ukomeje gutera ishema Akarere ka Rubavu mu marushwanwa y’igikombe cya Kagame Cup mu mupira w’amaguru bemeza ko ntakabuza izanatwara igikombe.
Nyuma y’umukino wahuje iyi kipe y’Umurenge wa Busasamana n’iy’Umurenge wa Nyarugenge mu guhatanira itike yo kwerekeza muri ½ cy’irangiza ry’aya marushanwa wabaye kuri uyu wa 11 Kamena 2023 Umurenge wa Busasamana wari wizigamiye igitego kimwe cyo ku mukino ubanza wabereye kuri Stade Umuganda mu Karere ka Rubavu igatsinwa ibitego 2 kuri 1 nyamara bikarangira ariyo yegukanye tike yo gukomeza muri ½ .
Mu kiganiro abafana b’Ikipe ya Busasamana,Abayobozi b’ikipe ndetse n’abo mu Karere bari baherekeje iyi kipe kuri uyu mukino wabereye kuri Stade Pele i Nyamirambo bashimiye ubwitange iyi kipe yokomeje kugaragaza kuva aya marushanwa yatangira bayisaba gukomeza guhesha ishema Akarere n’abagatuye.
Umunyamabanga Nshingwabikorwa w’Umurenge wa Busasamana Nsabimana Mvano Etienne yasahimiye abakinnyi b’ikipe y’Umurenge ayoboye umurava bagaragaje muri uyu mukino abibutsa ko ntakudohoka mpaka bacyuye igikombe.
Yagize ati:’’Reka mbashimire ko mwigishije Abanyamujyi umupira w’amaguru, n’ubundi aba ‘’Breziliens” niko tuba tugomba gukora cyane mu marushanwa nk’aya. Aba basore rero tumaranye igihe kinini muri uru rugamba aho twahuye n’amakipe menshi atandukanye bagakomeza kwitwara neza kugeza kuri uyu munsi.’’
Umuyobozi w’Akarere ka Rubavu wungirije ushinzwe imibereho myiza y’abaturage Ishimwe Pacifique avuga ko Akarere ka Rubavu kishimiye cyane aho ikipe y’Umurenge wa Busasamana igeze ashingiye ku mikinire y’abayigize akemeza ko bizeye ko izatwara iki gikombe ngo na cyane ko ibisabwa byose ngo ikipe itsinde babitanga.
Yagize ati ” Turishimye cyane nk’Inganji za Rubavu ko dukomeje guserukira neza Intara yacu aho twamaze kubona itike yo kwerekeza muri 1/2 kandi n’ubundi twizeye intsinzi, ibisabwa byose kugira ngo ikipe yacu itsinde turabifite kandi turebye uko iyi kipe yacu irimo kwitwara nta kabuza ko iki gikombe tuzacyegukana.’’
Perezida w’Inama Njyanama y’Akarere ka Rubavu, Kabano Ignace yashimiye uburyo iyi Kipe ikomeje guhesha ishema Akarere ka Rubavu n’abagatuye muri rusange asaba ko umurava n’umwete bikomeza kugeza igikombe gitashye mu Karere ka Rubavu.
Yagize ati:’’Mwakoze cyene turabahimira muduteye ishema nk’Akarere ka Rubavu kandi aho muzajya hose turi kumwe, ishema ry’Akarere murabona ko twatangiye no kujya muri Academy y’Igihugu. Turabifuriza rero intsinzi aho muzajya hose izo muzahura zose[ muzatupe ndani] muzatsinde gutyo.’’
Mu marushanwa ya Kagame Cup y’uyu mwaka Akarere ka Rubavu gafitemo amakipe atatu ageze ku rwego rw’Igihugu harimo iy’umukino wa Basketball, iya Volleyball ndetse n’iyi kipe y’umupira w’amaguru y’Umurenge wa Busasamana igeze muri ½ cy’irangiza.
Nubwo Ikipe ya Nyarugenge yatsinzwe na Busasamana ntibizayibuza gukomeza muri 1\2 kuko izasimbura ikipe ya Base yatewe mpaga kubera kwica amategeko agenga iri rushanwa igakinisha umukinnyi umaze umwaka agaragaye muri Shampiyona y’umupira w’amaguru mu Rwanda. Muri iki cyiciro kandi harimo amakipe arimo iy’ Umurenge wa Mwururu mu Karere ka Rusizi ndetse n’iy’Umurenge wa Ngarama mu Karere ka Gatsibo.
Ndungutse Abdoulkarim, Kvu24.rw