Rubavu: Ibitaro bya Gisenyi byungutse ibagiro ryitezweho korohereza aboherezwaga kuvurirwa ahandi.

Minisiteri y’Ubuzima, Ubuyobozi bw’Akarere ka Rubavu ndetse n’ubw’Ibitaro bya Gisenyi batangaje ko inzu y’ibagiro yuzuye mu Bitaro bya Gisenyi igiye gutanga umusanzu ukomeye mu kunoza serivisi zahabwaga abagana ibi bitaro kuko igiye kugabanya ku buryo bugaragara umubare w’abarwayi boherezwaga kuvurirwa mu bindi bitaro.

Ni nyuma y’uko kuri uyu wa 20/03/2025 mu Bitaro bya Gisenyi hatashywe inzu itangirwamo serivisi zo kubaga (Salle d’Operation), inzu y’indembe ndetse n’icyumba cyigishirizwamo byasanwe ku bufatanye na Operation Smile ikanashyira ibikoresho by’ibanze mu nzu y’ibagiro.

Umuyobozi Mukuru w’Ibitaro bya Gisenyi CSP Dr Tuganeyezu Oreste avuga ko ku ikubitiro iyi nzu y’ibagiro ndetse n’ibikoresho byayishyizwemo bije ari igisubizo ku barwayi baganaga ibi bitaro bakneye serivisi zo kubagwa bikaba ngombwa ko boherezwa kure harimo by’umwihariko Musanze na Kigali.

 Ati: “Ibi bitaro byajyaga bigira umubare munini w’abarwayi bakenera serivisi zo kubagwa ntibazihabwe kubera ahantu twakoreraga hatisanzuye hatanujuje ibyangombwa, igisubizo cya mbere n’icyo ngicyo.”

Yemeza ko ku ikubitiro bigiye korehereza nibura kimwe cya kabiri cy’abarwayi boherezwa mu bindi bitaro bakavunwa n’ingendo ndende wongeyeho no kubona ababitaho kubera kuvurirwa kure y’imiryango ndetse hanyuma ikazoroshya izi ngendo kugera ku kigero cya 75% igihe hazaba hamaze kuboneka inzobere mu kubaga amagufa.

Umuyobozi wa Operation Smile, Kayima Andrew yavuze ko iki gikorwa kiri mu rwego rwo kwegereza abaturage serivisi zo kubaga n’iz’ubuvuzi muri rusange bakeneraga bakazibonera kure kandi bibagoye bizeza gukomeza ubufatanye mu guteza imbere ubuvuzi.

Ati: “Twahismo ko dufatanya na Leta kwegereza abaturage serivisi z’ubuvuzi bwo kubaga ari nayo mpamvu twatashye inyubako twavuguruye mu buryo ihuza n’ibiknewe bigezweho muri iyi minsi.”

Yongeraho ko uretse mu Bitaro bya Gisenyi ibi bikorwa babikoreye no mu bindi bitaro byo mu Gihugu ndetse hakaba hari n’ibindi bateganya gufasha muri ubu buryo mu gihe kiri imbere.

Umuyobozi w’Akarere ka Rubavu wungirije ushinzwe imibereho myiza y’abaturage Ishimwe Pacifique ashima ibikorwa bya Operation Smile mu kwegereza abaturage serivisi z’ubuvuzi ndetse by’umwihariko bakaba barahisemo Ibitaro bya Gisenyi.

 Ati: “Ubuyobozi bw’Akarere burashimira Minisiteri y’ubuzima ubuyo idahwema kutuzanira abafatanyabikorwa batuzanira ibikorwa bitandukanye bidufasha mu gekemura ibibazo bitandukanye bibangamiye serivisi z’ubuvuzi; mu nyemerere rero nshimire by’umwihariko Operation smile kuri iki gikorwa cy’ingirakamaro yadukoreye.’’

Ashima ubwitange bw’abakora kwa muganga mu kwita ku buzima bw’ababagana akagaragaza ko n’ubwo bahora bahwiturwa haba hatirenagijwe ibyo bakora n’icyo bimariye Abanyarwanda ahubwo ko ikigamijwe ari ukurushaho kunoza mu rwego rwo gukomeza gushyira umuturage ku isonga.

Umuyobozi Mukuru muri Minisiteri y’ubuzima ushinzwe kugenzura ireme rya serivisi z’ubuzima, Dr Ntihumbya Jean Baptiste nawe ashima iki gikorwa agasaba abakozi b’ibitaro bya Gisenyi kwambarira kukibyaza umusaruro.

Ati: “Niba hari ikintu kijya gitera ibibazo abaganga ni ikintu cyo kuba ahantu hatisanzuye kandi nta gikoresho ufite; nk’uko umuhinzi yishimira ko imvura yaguye akavuga ati noneho ejo turazinduka tujya guhinga, ubu ndizera ko Staff (Abakozi) ba Gisenyi mu gitondo iyi nzu iraba ari ibindi bindi. Baratangira gukora akazi neza kandi bishimye.”

Ashimira cyane Operation Smile, Umufatanyabikorwa wa Minisiteri y’Ubuzima kuko iri mu murongo w’Igihugu aho ifasha mu gutanga ibisubizo ku bibazo kiba gishyize imbere gukemura mu nyungu z’abaturage zirambye.

Kugeza ubu mu Rwanda buri muturage ashobora gukoresha nibura amasaha abiri akaba ageze aho ashobora kubonera serivisi zo kubagwa, ibi bikanajyana n’uko kugeza ubu umuturage ashobora gukoresha iminota mirongo ine n’irindwi (47) kugira ngo agere aho yabonera serivisi z’ubuvuzi.

HAGENIMANA Placide