Abaturage barenga 50 bishwe bashaka ibiribwa muri Gaza, abandi 400 barakomereka
Abanya-Palestine barenga 50 bishwe naho abandi basaga 400 barakomereka ku wa Gatatu bari bategereje ibiribwa hafi y’umupaka wa Zikim mu majyaruguru ya Gaza, nk’uko ibitaro byabitangaje. Ibyo byabaye mu gihe intumwa yihariye ya Leta Zunze Ubumwe za Amerika, Steve Witkoff, yari mu ruzinduko muri Isiraheli.
Amashusho yafashwe yerekanaga inkomere n’abahitanywe n’icyo gitero bajyanwa ku bitaro bya al-Shifa muri Gaza City hakoreshejwe amagare.
Ishami rya Gaza rishinzwe ubutabazi riyobowe na Hamas ryatangaje ko ingabo za Isiraheli zarashe ku baturage bari bateraniye hafi y’amakamyo atanga imfashanyo. Igisirikare cya Isiraheli cyavuze ko cyarashe “amasasu yo kuburira” ariko ko “nta makuru gifite y’abantu bahakomerekeye cyangwa bahapfiriye.”
Steve Witkoff yahuye n’abayobozi ba Isiraheli mu rwego rwo gusunika ibiganiro byo guhagarika imirwano no gufasha kugabanya ibibazo bikomeye by’ubutabazi muri Gaza.
Abategetsi ba Isiraheli baburiye ko nihatagira intambwe igaragara iterwa mu masezerano yo guhagarika imirwano no kurekura imbohe, bashobora gufata ingamba zikomeye kuri Hamas, harimo n’izo kwegukana bimwe mu bice bya Gaza, nk’uko itangazamakuru ryo muri Isiraheli ribivuga.
Byanatangajwe ko Witkoff azasura ibigo bitanga imfashanyo muri Gaza bikorana n’Ikigo GHF (Gaza Humanitarian Foundation), gishyigikiwe na Isiraheli na Leta Zunze Ubumwe za Amerika, ariko kivugwaho impaka nyinshi.
Nyuma gato y’uko Witkoff agera muri Isiraheli, Perezida wa Leta Zunze Ubumwe za Amerika Donald Trump yanditse ku mbuga nkoranyambaga ati: “Inzira yihuse yo kurangiza ibibazo by’ubutabazi muri Gaza ni uko Hamas IKWIYE GUTANGA IKAREKURA IMBOHE!!!”
Minisiteri y’ubuzima iyobowe na Hamas muri Gaza yatangaje ko ku wa Gatatu abandi bantu barindwi bishwe n’inzara, ibi bikaba byazamuye umubare w’abamaze kwicwa n’imirire mibi kuva intambara yatangira ukagera kuri 154.
Ibi byabaye nyuma y’umunsi umwe abahanga mu gucunga umutekano w’ibiribwa bashyigikiwe na Loni baburiye ko “ibihe bikomeye by’inzara bimeze nabi cyane birimo kubera mu baturage miliyoni 2.1 ba Gaza.”
Amashyirahamwe ya Loni nayo yavuze ko hari inzara ikomeye itewe n’abantu muri Gaza, bashinja Isiraheli ibifitiye uruhare binyuze mu gucunga uburyo imfashanyo zinjira. Ariko Isiraheli yo ihakana ibyo, ivuga ko nta nzitizi iriho ku gutanga imfashanyo kandi ko nta “nzara iri muri Gaza”.
Nubwo bimeze bityo, iminsi ine ishize Isiraheli yashyizeho ingamba igaragaza ko zigamije gufasha Loni n’abafatanyabikorwa bayo gukusanya imfashanyo no kuyikwirakwiza imbere muri Gaza. Izi ngamba zirimo “igihe cyo guhagarika imirwano buri munsi” mu turere dutatu, hamwe no gushyiraho inzira ziswe “inzira z’imfashanyo zihariye”.
Gusa, ibiro bya Loni bishinzwe ubutabazi byavuze ko ayo masaha yo guhagarika imirwano atahagije kugira ngo imfashanyo zihagije zinjire no gukemura ibikenewe byose. Bagaragaje ko abaturage bashonje bikabije bagikuraho imfashanyo ku makamyo mu gihe anyura ku mipaka ya Isiraheli.